நேசத்தின் பொழுதுகளில்..

எழுத்துக்களாலான நட்புகளின்

முகம் பார்த்தலின் மிச்சமாய்

அவரவர் கழட்டிப் போட்ட சட்டைகளில்

அனைவரின் வாசமும்..

--

நிறைகுடங்கள் தளும்புவதை

நிரூபிக்கின்றன

சற்று முன் நிறைந்திருந்த

காலிக் கோப்பைகள்..

--

என் விரலிலிருந்து வழியும் 

ரத்தம் பாதிவெட்டுண்ட

ஆப்பிளின் மேலே

உணர்த்தியது

பழத்தின் வலியை

--

உயர்த்திய கொள்ளி

வெறுப்பைத் தந்தது

காலடியில் தாழ்த்தியும் 

நிமிர்ந்தேதான் எரிகிறது.

--

அது ஆயிற்று குரங்கிலிருந்து நிமிர்ந்து

செவ்வாயில் எல்லைக் கோடு கிழிக்க

அளவெடுப்பது வரைக்கும்..

இப்பொழுதுதான் பாலே குடிக்கின்றன 

கடவுள் சிலைகள்..

.